حوزہ نیوز ایجنسی کی رپورٹ کے مطابق، پاکستان کے صوبہ سندھ کے شہر رتوڈیرو میں متنازع بورڈ پر درج عبارت کے حوالے سے ڈپٹی کمشنر لاڑکانہ کی سربراہی میں اعلیٰ سطحی اجلاس کے بعد صحافیوں سے گفتگو کرتے ہوئے مولانا ڈاکٹر فرمان علی معصومی نے کہا: سب سے پہلے یہ پہچاننا ضروری ہے کہ سامنے والا شخص کون ہے۔ اہل سنت میں ایسے بہت سے افراد موجود ہیں جو اہل بیت علیہم السلام سے محبت رکھتے ہیں، لہٰذا ان کے ساتھ عزت، احترام اور حسنِ اخلاق کا برتاؤ کیا جانا چاہیے۔
انہوں نے کہا: ہماری طرف سے ایسی کوئی بات یا طرزِ عمل سامنے نہیں آنا چاہیے جس کے نتیجے میں محبانِ اہل بیت علیہم السلام کے درمیان اختلاف یا دوری پیدا ہو خصوصاً ان اہل سنت بھائیوں کے ساتھ جو اہل بیت علیہم السلام سے محبت رکھتے ہیں۔
مولانا ڈاکٹر فرمان علی معصومی نے مزید کہا: البتہ جو عناصر اہل بیت علیہم السلام سے دشمنی رکھتے ہیں، ان کے مقابلے میں حق اور حقیقت پر ثابت قدم رہنا چاہیے اور کسی قسم کے دباؤ یا خوف کا شکار نہیں ہونا چاہیے۔
انہوں نے کہا: جو شخص حق بات کہنے سے صرف اس خوف کی وجہ سے گریز کرے کہ اسے مشکلات یا مسائل کا سامنا کرنا پڑ سکتا ہے، وہ اپنے دینی فریضے سے غفلت برتتا ہے۔ اہل بیت علیہم السلام کے پیروکاروں کو ہر حال میں حق کا ساتھ دینا چاہیے اور باطل کے سامنے استقامت کا مظاہرہ کرنا چاہیے۔
آپ کا تبصرہ